كلمات قصيدة " أخر مرة أقابلك" إبراهيم فرج
طب اقوله ايه ! وانا كل ما اصحي ابقي زي الجمل واقف ف صحرا معاكي مش عارف ايه اللى ممكن يعمله .. لو يوم عطش او جاع ساعتها بس هيبقي فيه حلين هيسيب ف نفسه الاحتياج يقتله او يجي ليكي تأكليه أوجاع مش عارف افضل تانى ولا امشي كل الشوارع زي قلبي تمام .. سهرانه تبكي من الفراق فاضيه وانا لسه بسرح ف الخيال وافتكر مسافات طويله مشيتها وياكي او مره لما قطعت تذكرتين ودخلت فيلم قديم وبتحبيه كان الغياب الكرسي بيخبيه وفضلت طول الفيلم بحكيلك احزان كتيره وجرح وهزيمة وعرفت انك كنتى مش جنبي من صوت لناس قاعدين وبيقولو مجنون بيحكي ل كرسي ف السيما جربت حتي اشتغل وانسي فسألت صاحبي قاللى عنده مكان .. خدت الورق وحاجاتي قدمتها وقالولي ممكن تبقي شيف مثلا اسبوع يدوب كان عدي وانا شغال بالصدفه شوفتك جايه تتغدي كانت مفجأه وصدمه خضتني لميت حاجاتي وقولت انا اسف انا لازم امشي نصيب والدنيا مقسومة لكن ساعتها انا خوفت لو جيتي والأكل جالك يومها من ايدي ف ساعتها بس هدوقك وجعي وانا اخاف عليكي تموتى مسمومه فيه غرزة جوه قميصي من ايدك ومفيش مكان هيساع غرز تانيه الخوف بيقتل فيا باستمرار ستين دقيقة بس ف الثانية معرفش ليه تعبان كده المرة دي مش قادر اتحمل حل الغياب والله مش جلسات نفس ولا بالعلاج ولا بالوعود كان بس يكفي ان اللى غاب بعد اما غاب يرجع يعود الحل ايه .. وانا لسه كل اما ابص ف مراية الاقيكي واقفه تسرحي شعرك اضحك واقولك برده مش مظبوط تضحكي وتمشي ... مش سهل اشوفك عني تتخلى ولا اشوف نهايتي تكون كده بالفرقه دي .. فيه اسرة كامله مجاتش للدنيا ذنبهم رابط رقبتى بحبل الحياه السري مخنوق وروحى بتندهك تيجي وعنيا ماسكه بدمعها المناديل وبتشاور دمي قاطع تذكره لقطرك اللى مجاش وقلبي من اخر زيارة نسيته ف القشاش الناس بتمشي ويدهسوه بالجزم وانا لسه بلجأ للدعا بعد كل أدان ومفيش دعاء من قلبي يوصلك من غير ما قلبك يبقي عنده ودان انا مش هبيع نفسي ولا عندي رغبة ف لعبة الدنيا ترميها ليا ف ايدي .. اتعلق وتاخدها مني وتمشي تنساني الدنيا ظالمه بتقتل الانسان اول ما يبقي معاها انساني فيه قطع حاد ف الأورده الأولى سامع تمزق اربطه ف قلبي وضلوعي بايظه بفعل تكسيرك ايه اللى اغرب ف الحياه من كده انك تسيبي وتمشي متأكده ان العلاج لضلوعي مساميرك الخبطه جات ف القلب مش ف الصاج اكتب قصيدة ولا اعيط سنه ! بصيلي جايز تعرفي وجعي ويتم نقله ما بينا بالنظرات اخر ازازة مية من ايدك انا كنت بشرب منها ع السنه املا ف انك تفضلي شوية ومشيتي برده ف التلت مرات بدخل كافيه المعمورة يوميا وف كل مره بيسألو عنك بكدب عليهم وبقولهم جاية السكه واقفه وعذرها معاها من يومين قاعد هناك بفتكر علبة سجاير جبتيهالى كادو او لما كنتى بتوصفي البلاتوه ولقيتني تايه بين كراسي الناس عمال بلف عليكي مش لاقي ف طلبت شيكي قبل ما اتحرك ودفعت قلبي مخدتش الباقي شوفتيني بغرق مرة قدامك وفضلتي واقفه بمنتهي القسوه كان وجعي زي الراكيت وبتلعبيه لوحدك وفضلت بنده ليكي وبشاور ارجوكي شديني ! لفيتي ليا وجيتي بهدوءك مجرم وجاي قصادى يتمشي لكن حقيقي وقتها فعلا انا مت قبل ما تقطعي القشه كان نفسي اشوفك مره واحده كمان واخدك ف حضني بس مش جامد خوفا عليكي من جراحي الموس كان نفسي اقولك "ربنا معاكي" وايديكي تمشي ببطء من ايدي ويكون فراقنا ف الايدين ملموس لكن عرفت قمية الخضرة ف البساتين وقت إما روحت اتمشي ف الوحله كل البنات كات حلوة ف الفساتين بس انتي كنتي ف الفراق احلى.. اياك تدخل حد ف حياتك او شخص ياخد نسخه م المفاتيح الناس ف غمضة عين بتتغير زي الجيلاتى لما فجأه يسيح هتعيش وحيد ف الدنيا دي غلبان والناس يا صاحبي مبيعرفوش يقروك هتلاقي نفسك بعد مده وحيد وتقضي عمرك ف الحياة متروك افضل هروب هيكون ف اولها انفاق كتير م السهل ننزلها علشان كده مقدرتش اعملها واكتب لصاحبي اللى ارتبط مبروك
الله عليك والله انت باشا🤩
ردحذفجميلة جدا
ردحذف