قصيدة "لو كنتي استنيتي شوية" عمرو حسن مكتوبة

لو كنتي استنيتي شوية
كان يمكن نتجوز
ونجيب أطفال سُّذج تشبهنا
ونقضي السهرة بنتفرج علي فيلم قديم
وننام بنفكر في حياتنا
فتقولي لنفسك : لو كان بيخونني كانت مناديله هتعرق روج
فاضحك وانا نايم وافردلك ايدي
فتنامي ببطء وتحطي اديكي ف ايديا

كنت هاذاكر لعيالنا حساب
واشتكي من نقص الملح ف اكلك
واديك المصروف الشهري
فيضيع نُصه ف تجديد الأوضة وستارة البلكونة البحري
ويهل علينا الشهر التاني نسهر نحسبله
العب ف التراس مع ابوكي طاولة واتغلبله
تضحكي / اضحك
تندهيلنا للغدا نتغدي
كان زمان العمر عدي خفيف عليا
لو كنت استنيتي شوية
كنت هابوسك قبل ماسافر ع الباب
من غير ماولادنا يشوفوا
ويمر عليكي الليل
تقري ف اوراقي علي المكتب
فتلاقي قصيدة قديمة
تقنعي نفسك انها ليكي
تقريها لجارتك في التليفون
وتنامي وهي ف حضنك تستنيني ارجع
وتقولي بحبك فاسمع
وارجع اسرع
تبوسيني قصاد الباب من غير ماولادنا يشوفوا
وتأجل حضن كبير للسفرية الجاية

كنا هنضحك ع الشعر الابيض
اول مايشب ف راسنا
تصبغي شعرك
افهم
تضايقي
ماهتمش
احلفلك ع المصحف انك اجمل من كيت وينسلت
فتبان ف عنيكي فرحة وتنزاح الكآبة
تقوليلي ان انا اجمل من رشدي اباظة
اضحك
كداب بيجامل كدابة
كنا زمنا بنضحك ع الماضي
ونجهز روحنا للرحلة الجاية
بالذمة
مش كل المدهش ده
كان يستاهل تستني شوية .