كلمات قصيدة "هنسيب ولا هنتساب" إبراهيم فرج
كلمات قصيدة "هنسيب ولا هنتساب" إبراهيم فرج
العمر مازال واقف ع الباب يتفاوض وياك
الهوا ف كياك مرعب جدا
والناس ازمتها ف ناس تانيه
وان كان أزمتى حلها عندك
ف انا لسه يدوبك بتهجى حلول
ارجوكي بلاش اى نصايح
وسبيني بدونك ف الأزمة ..
شبه الروماتيزم ف رجل الايام
ووجودك دوا من غير لازمه
انا يمكن اكون اكون انسان سادي
وف حُبك قد كنت أنانى
كل اللى هينفع دلوقتي انك تمشي ..
ارجوكي امشي
متجيش تانى .
مبقتش خلاص حمل جدالك ..
ولا اعاتبك واصالحنى بدالك
ولا اكون مخنوق وبقول مالِك ..
انا وانتى ضحية اهمالك
وضوافرى ابيضت من نقصك فيا ..
كان بينا وعود وكلام ياما ..
وقفتنا ف شارع معرفش مكانه
ولا شكل عمود النور اللى سندنا عليه ..
معرفش "بحبك" يومها إتقالت ردّا على ايه
واتقالت ليه !
هل سالت دمعه على خدودك
هل ردا مني على وعودك
ام كنت مصر على وجودك
ودخولنا ف خانة مبتساعش اتنين
وخدانا على فين بس يا دنيا
الشيش متوارب على قلبي من ليلة امبارح
مش عاوز ازعاج
سايب ف رسايل ياما
ارجعي وشوفيهم واقري المكتوب
ماتجيش قدام الشيش عندي وتحدفي بالطوب ..
انا قلبي خلاص نايم دلوقتي ..
وهيصحي الصبح وينساكي
ده انا كنت شاعر
صب الزمن ف كاسات
وزعها ع المخاليق
واتغنو اشعاره ..
ساب المربع وانفصل عن باقي اضلاعه
قطع ضلوعه لتسعين وتسعه
وسماهم الحسني
صايم فصول السنه يفطر بـ لقياكي
يطلع لوحده القمر ويغيب لرؤياكي
كنتي افروديت ف جمالها وكونها أسطوره ..
او تلج سايل من عصير الشوق
على لوح ازاز بايش
تروى المريض بالموت
وترد فيه الروح ويرجعه عايش
كان يوم مليء بالورق ف شوارع الذكرى
كان الهوا نايم على حافة الشباك
والراديو كان صاحي على غنوه بكتبها
البنت مش حباك وضرورى هتسيبها
فرد الضلام نوره على صوره ف المحتوى
شكلتها ف طريق وايدينا مشييت سوا
حسستها بالخطر من رعد جابه المطر
احضنها يتلاشا ..
ف لقيتني حاضن هوا
ردت ف روحي الباب
وعرفت ف الاخر ..
هنسيب ثم هنتساب
تعليقات: 0
إرسال تعليق