قصيدة "كلب البنات" أميرة البيلي
كلمات قصيدة "كلب البنات" أميرة البيلي:
لو كنت بتحبني ، كان بان فـ عينك لهفتك ليا
أو كنت حتي قدرت ادوق الحب فـ سلامك
لو كنت بتحبني كان بان فـ فعلك مش بانلي فـ كلامك
لكن محبتنيش!!
فـ طبيعي كنت تسيب إيديا فـ آخر الرحلة
تهرب عشان أدركت حبك فيها مش فيا!!
لو كنت بتحبني ، كان بان فـ عينك لهفتك ليا
وقت اما قولت سلام ومهتمتش ..
أو لما شفت إيديا بتسيبك
والرعشة حالفة تقولك استني
ومستنتش!!
لو كنت بتحبني كنت اما أقول محتاجة قربك
تحضن وريدي بخوف وتبقالي
لكن مبقيتش!!
علشان كدة عمرك ما حبتني ..
عارف !!
كرهت اشوف اسمك بيظهر كل يوم ف السيرش
كرهت اشوف صورتك أو حتي اخش مكان بيجمعنا
كرهت اجيب سيرتك فـ اي كلام
وقولت عنك" شخص اي كلام "
وانك مريض بالكدب والتبرير
طبعك وسخ بيقل فـ التقدير
قلبك كازينو يساع بنات الكون
خاين وعامل فيها الطيب المسكين
شيطان رجيم بيدور علي المخاليق
ويقولهم غلبان كل البشر تركوني ولوحدي
كلب البنات مش سهل نعدل ديله والله
كلب البنات بيعيش عشان يفضل يخون ويعض ايد
بتعكزه ، كلب البنات هتجيله واحدة تعجزه
تاخد بذنب صبايا كَسر قلبهم ..
كلب البنات هيموت وهو فـ حضنهم!!
يخرج من البنت الجميلة لغيرها اجمل حبيتين
ويسيب فلانة بكلمتين ، " آسف ظروف "
كلب البنات هيعيش خروف
وهتيجي واحدة تجر فيه!!
داين تدان واتفرجوا
كل الي حاولوا يهربوا من ذنبهم
ربك كريم وعقابه صابه فـ قلبهم
من قتل يُقتل
من جرح يُجرح
من ظلم يُظلم
والكلب لو يوم اتصعر
طلق الرصاص هيموته
كلب البنات هتجيله واحدة تسكته
وتدوس عليه ..
خليني اقولك شئ مهم اختم كلامي عليه ..
انا كرهتك!!
وكرهت احس بطيف
يشبه لـ طيفك اذا مر من جنبي
عارف!!
الحب لو ذنبي اقسم برب قلوبنا انا استغفرت
ونويت اتوب عن حبك الزايف
م الصعب اكرر ذنب حبك من جديد
لا يلدغ الشاعر من جحر حب لـ مرتين
واديك خلاص اصبحت فـ قصيدتين
وقفلت ورقي عليك ..
وبدأت أعيش لحياة بتشبهني ، وبدأت أعيش فـ حياة بتشبهني ..
وخلاص ملاني يقين أنك محبتنيش
علشان كدة بنساك ونجحت والله
وحلفت ابدأ من جديد
لو كنت يوم بتحبني كان صعب تبقي بعيد
أو تزرع الحزن بأيديك فيا ..
لو كنت بتحبني كان بان فـ عينك لهفتك ليا ..
علشان كدة كلب البنات هيموت فـ آخر رحلته ضحية
جعلك الله في الدرجات العليا
ردحذفبجد بحبك
ردحذف